چیا پرێس - خێرۆ گرعزێری

1ی حزەیرانێ دبە رۆژا جیهانی ئا زارۆکا، ل سەرانسەری جیهانێ ب ڤێ هەلکەفتێ ئاهەنگ ژ زارۆکا رە دئێنە چێکرن، لێ ئەڤ یەک ژ وەختەکی دەیە کە هەتا چارەنڤیسێ ب سەدا ژ زارۆکێت ئێزیدی کە بەری نێزیکی 9 ژبا داعش ڤە هاتبوونە رەڤاندن دیار نینە.

حسێن کۆرۆ رێڤەبەرێ نڤیسینگەھا رزگارکرنا رەڤاندیێت ئێزیدی دبێژە، "ژ ئەنجامێ هێرشا تیرۆرستێت داعش بۆ سەر شنگال و دەوروبەرا ل 3ی ئابا سالا 2014ـێ 2745 زارۆک ئێختیم بوون".

"دیسا ژی ژمارەکا مەزنا زارۆکا هاتنە کوشتن لسەر دەستێ داعش ژبلی وان یێت هەتا نهوە ل دەستێ داعش دە ماین و چەکدار کرین".

هەروەها لگۆری ئامارەکا نڤیسینگەھا ناڤهاتی هەتا نهوە 2016 زارۆک ژ دەستێ داعش هاتینە رزگارکرن و پتریا وان ئەڤ چەند سالن دکەمپێت ئاوارەیێ دە ل سنوورێ پارێزگەها دهۆکێ و ئیدارا سەربەخۆیا زاخۆ و کەمپا سەردەشتێ ل چیای شنگال دژین.

کەس و خوەیێت وان زارۆکا ژی گازن و وەکە خەلیل مراد بابێ یەک ژ وان زارۆکا دبێژە، "چ پشتەڤانی ژ زارۆکێت مەرە نایە کرن و رەوشا وان نا قەنجە".

"هەتا نهوە وەکە پێدڤی حکومەت و ڕێکخراو لبەر بارێ وان رانابن و هاریکاریا دەروونی ژێ رە پێشکێش نەکرینە"، بابێ یەک ژ زارۆکێت ڕزگاربووی وەها دبێژە.

هەر ژ ئەنجامێ وێ هێرشا تیرۆرستێت داعش ب هەزارا خەلکێ شنگالێ ئاوارە و هیش ب رێژا هەرە مەزن ژ وی خەلکی و زارۆک ب تایبەتی ل بن چادرا و ژ دووری هەموو ماف و ئازادیا خوە ژیان دکن.