بەری ساڵێک
ذياب غانم
ل هەر پێشهاتەیەکێ دا کو کەمئاین تێدا ئالیەک بن ئێکسەر سەرنڤیسەر و پیتدانەرێن ئاژانس و دەزگەهـ و کەنالێن کوردی دێ ناڤێ وێ کەمئاینێ وەک مەرتال ژ ئەنجامدەرێ وێ بوویەرێ را بکارئینن وەک خالەک بۆ سەرنج ڕاکێشانا خەلکی و ڤەکرنا وێ نووچەیێ و ل بەرامبەر دا دەمێ بوویەرێن کو ئەنجامدەرێن وان نە ژ کەمئاینان بن بتنێ پەیڤا "کەسەکی" بکاردئینن پرسیار ل ڤێدەرێ دەستپێدکەت ئەرێ ڕاگەهاندنا کوردی کەمئاینان کێم دکەت؟
هەر رۆژ ل هندەک مانشێتان دا ئەم دبینن کو پیتدانەرێن وێبسایتان دنڤێسن ئێزیدیەکی هۆسا کر و کرستیانەک ئەڤی کاری دکەت و زەردەشتیەکی چالاکیەک ئەنجام دا، یان ژی دێ بێژن چار تاونبارێن ئێزیدی هاتنە گرتن، ئەرێ دەستووری مافێ ئەڤان کەمئاینا خواریە بۆچی تو ڤان زاراڤان بکاردئینی بۆ لایک و کۆمێنتێن خۆ؟
ل پەرەنسیپێن نیڤدەولەتی یێن ڕاگەهاندنێ دا جەخت ل سەر دوورکەتن ژ ڕەگەز پەڕەسیێ و ژئێکگرتنێ هاتیە کرن و رۆژانە و ب هەزارێن دۆلاران ل وۆرکشۆپ و خۆلێن ڕاگەهاندنکارا دا یێن سەبارەت ڕەق و کینێ دهێنە مەزاختن ئەرێ مانە بەسە ژ ڤان خۆلێن دوور ژ ڕاستیێ؟ تو کەمئاینی ل ڕاگەهاندنێ دا و ل دەستووری دا و ل پەرلەمانی و ل هەر دەرێ! ها ئەڤەیە ڕاستی.
تاوانبار ل چاڤێ یاسایێ دا تاوانبارە چ ئێزیدی بیت یان کرستیان بیت یان موسلمان بیت یان زەردەشتی بیت و داهێنەر ژی هەر داهێنەرە و ئەگەرێ کو ئەو پالدایی ببیتە داهێنەر یان هەر تشتەکی دی نەک ئاینە بەلکو زانستە و حەزا وی مڕۆڤی یە.
روودانێن تیرۆری و کوشتن ل واشنتۆن ژی هەنە و ل شنگالێ ژی هەنە و ل هەولێری ژی بەلێ بۆچی دەمێ روودانەک چێدبیت ئێکەمین تشت ل ڕاگەهاندنا کوردی دا کو ئاشکرا دبیت ل دۆر تاوانباری ئاینە ئەگەر ژ کەمئاینان بیت.
بەلێ بۆ ڤەگوهاستنا نووچەیان وەکی خۆ بێی زێدەهی و کێمایی لێ نەخێر ژ بۆ ڕەق و کینێ، جەماوەرێ ئارمانج ژی ئەوان نڤیسێن تە دبینێ و ب ڤێ یەکێ تو ڕەق و کینێ بەڵاڤ دکەی و زێدەتر دکەی ل جهێ کو تو ببیە رێگر ل بەڵاڤبوونا وان.
تشتەک بتنێ دکەت کو تو وەک سەرنڤیسەر یان ژی پیتدانەر دوور بکەڤیت ژ ئەڤان دەستەواژان ئەو ژی کو تو خۆ ل جهێ ئەوان کەسان دانی یێن کو تو ل سەر دنڤیسی یان ژی ل جهێ وێ کەمئاینێ دەمێ تو ئەوان ل پێش چاڤێن جەماوەرێ خۆ کێم دکەی.