بەری ساڵێک
چیا پرێس - لەیت حسێن
سال بۆ سالێ خزمەتگوزاری و هاریکاری دنێڤ کەمپان دە ب ئاوایەکی گشتی کێم دبن لێ دناڤ ڤێ کێشەیا وەها مەزن و پر دەردەسەری کەیسەکا ب زەحمەتتر و ئازارتر هەیە کە بەشەکا ئازارێت ئاوارا وەکە زووما دیمەنەکی زێدەتر ژی نیشان ددە.
دنهوە دە و پشتی هەوقاس سالا هەتا نهوە رەوشا خوەدان پێدڤیێت تایبەت گەلەکا پەریشانە ب ئاوایەکی کە پتریا وان بێ مووچە و هاریکاری نە ژ دەزگەهێت کاربدەست ل حکومەتا عێراقێ.
"سەلام خدر" یەک ژ وان کەسێت خودان پێدڤیێت تایبەتە ل نێڤ کەمپا د دژیت دبێژە، "ژ زارۆکاتی ڤە رەوشا من هەر وەها یە چ هاریکاری بسەر مە دە نائێنە بەلاکرن ئەم گەلەک ژبیر کرینە دنێڤ کەمپان دە ئەوا پێشتر دهاتە کرن ژی نهوە نەمایە".
"تنێ جارەکێ عەرەبانەک ژبا رێکخراوەکا بیانی ڤە ب من هاتیە دان لێ ئەو ژی نەمایە حکومەت ژی سەرێ خوە ل مە نا ئیشینە و چ هاریکاری ژ مەرە نائێنە دابینکرن"، سەلامێ 20 سالی وەها گۆت.
ل شنگالێ کە جهێ بنەڕەت یێ ڤی خەلکی یە هەتا نهوە چ نڤیسینگەهـ یان رێڤەبەریەکا پەیوەندیدار ب چاڤدێریا جڤاکی ڤە نەهاتیە ڤەکرن لۆما بارێ ڤان کەسا گرانتر بوویە و گەهاندنا هاریکاریا ژی ب وان زەحمەتە.
هەروەها" سلێمان حسێن"ـێ خودان پێدڤیێت تایبەت خوەیا دکە، "نە پێش هێرشا تیرۆرستێت داعش و نە پشتی هێرشێ من بخوە چ هاریکاری وەرنەگرتینە بۆ نموونە هەتا نهوە ئەم نەهاتینە تۆمارکرن ژبا حکومەتێ ڤە وەکو ئامار و
کەسێت ژ ڤێ چینێ دا هاریکاریا مە بێتە کرن".
"کەمپە ژمەرە ژ جهێت دی ب زەحمەت ترن ژیان گەلەک ب ئازار و دەردەسەری برێڤە دچە ژبەر تەنگیا جهی و نەبوونا پشتەڤانیەکا باش ژ مەرە و ئەز تنێ د مالباتا خوە دەیمە لۆما حەوجەیە زوو ئالیێت پەیوەندیدار ب ئەرکێ خوە رابن"، سلێمان کە خوەدانێ 2 زارۆکایە وەها گۆت.
هەبوونا ژمارەکا مەزنا کەسا ژ ڤێ تەخا زولم لێکری و رەوشا وان ئا خەراب وەها ل رێکخراوا و دەزگەهێت خێرخوازی نەکریە کە هاریکاریا وان بکەن.
دەیان جەعفەر رێڤەبەرێ کۆچ و کۆچبەرا و بەرسڤدانا قەیرانا ل دهۆکێ ژ چیا پرێس رە راگەهاند،" ژمارا وان کەسێت خوەدان پێدڤیێت تایبەت دنێڤ کەمپا دە دگەهیە 1726 کەسا تنێ ئاوارە و رەوشا ژیانا وان گەلەکا پەریشانە و چ هاریکاری وەکە حەوجە ژێ رە نائێنە دابینکرن".
ئاماژە ب وێ یەکێ کر، "ئەم ژی دبینن کە ئەڤ چین گەلەک نە حەقی ل بەرامبەر هاتیە کرن و حەوجەیە هاریکاری و پشتەڤانیەکا وان بئێتە کرن ژبا حکومەتا عراقێ ڤە ب رەسمی وەکە کا چاوا ل گەلەک دەڤەرێت دی هاریکاریا وان دئێتە کرن ب رێیا ڤی مووچەی".
برێیا زانیاریێت خوە مە زانیە کە هەیامەکێ بۆ یەکا دی برێیا لقێ کۆچ و کۆچبەرێت عراقێ ل دهۆکێ، ژمارەکا ناڤێت خوەدان پێدڤیێت تایبەت دنێڤ کەمپا دە و ژ دەرڤەی کەمپا دئێتە تۆمارکرن لێ هەتا نهوە پتریا وان ژ مووچە بێ پاینە و چ شایستە ب سەر وان دە نەهاتینە بەلاکرن.