چیا پرێس - خێرۆ گرعزێری

سەرباری ڤەگەریانا بەشەک ژ خەلکێ کۆمەلگەها گرزەرک ل قبلەتا چایێ شنگالێ لێ دنهوە چ خزمەتگوزاری لێ نینە و مالباتێت ڤەگەریاین دشەڤێت تاری دە ل کۆمەلگەها خوەیا پشتگۆهئاڤێتی ژیان دکن.

نەواف هەبۆ یەک ژ وان کەسێت ڤەگەریایە ڤێ کۆمەلگەهێ دبێژە، "زێدەتر ژ چار مەهایە ئەم ڤەگەریاینه گرزەرک لێ حکومەتێ چ هاریکاری نە گەهاندینه مە و نە ئەم قەرەبوو کرینه نە دوورە کە خەمساریا حکومەتێ ببە سەبەب دیسا ئەم ل کەمپا ڤەگەرین ژبەر خەرابیا ژیانێ ل کۆمەلگەها مە".

بەشەکێ دی ژ خەلکێ گرزەرک دیار دکە نە بتنێ خزمەتگوزاری نینن بەلکی حکومەتێ چ رۆل و فەرمانگەهەک ژی دڤێ کۆمەلگەهێ دە نینە.

جاسم جردۆ وەلاتیەکی دیێ خەلکێ ڤێ کۆمەلگەهێ یە خوەیا دکە، "نەبوونا ئاڤا ڤەخوارنێ، کەهرەبێ و پێدڤیێت ژیانێ ئەو بێ هیڤی کرینه نهوە ئەم دتاریێ دە و بێ کەهرەب دمينن، لۆما هیڤی دکن حکومەت گۆهێ خوە بدە وان و ل کۆمەلگەها وان ڤەگەریێ و فەرمانگەهێت خزمەتگوزاری لێ ڤەکە".

ژبەر ئاوارەیا ئیدارا ناحیە گرعزێر کە کۆمەلگەها گرزەرک سەر ب وێ ناحیێ ڤەیە، ئەڤ ناحیە ب گوند و کۆمەلگەهێت بسەرڤە ژ گەلەک هاریکاری و خزمەتگوزاریا بێ پایە.

خوەدێدا حەسەن نوونەرێ ئیدارا ناحیێ ژ چیا پرێس رە گۆت، "براستی خەلکێ گرزەرک گەلەکێ زولم لێکریە و چەند جارا وان حەوجەیێت خەلکێ ڤەگەریای گەهاندینە حکومەتێ و رێکخراوا لێ هەتا نهوە چ چارە ژێ رە نەدیتینە".

ئاماژە ب وێ یەکێ ژی دکە، "دنهوە چەند رێکخراوا سۆز دایە تشتێ کە حەوجە بە ژ خەلکێ رە دابین بکن لێ براستی ئەڤ بەس نینە و دڤێت ئاڤاکرن و قەرەبووکرن ژی هەبە ژبا حکومەتێ ڤە دا خەلک کاربە ڤەگەریێ".

کۆمەلگەها گرزەرک ب درێژاهیا 20کم دکەڤیە باکوورێ قەزا بەعاج و ژئالیێ ئیداری ڤە بسەر ناحیە گرعزێر ڤەیە ل سنوورێ وێ قەزایێ و بەری هێرشا داعش ل سالا 2014ـێ ژمارا روونشتڤانێت ل ڤێ کۆمەلگەهێ نێزیکی 18000 هەزار کەسی بوو و پتریا وان ئێزیدی بوون.

ل وەختێ هێرشا تیرۆرستێت داعش بۆ سەر شنگال و دەردۆرێت وێ خەلکێ کۆمەلگەها گرزەرک بەرخوەدانەکا مەزن ل دژی وان کر و ژمارەکا مەزنا خەلکێ وێ بوو قوربانی.