بەری ساڵێک
چیا پرێس - خێرۆ گرعزێری
هەیاما چەند مەهایە ماددە ئار و ماددەیێت دی یێت خوارنێ کە ژبا حکومەتێ ڤە برێیا وەکالا دئێنە داین دەرەنگی کەتیێ ب ئاوایەکی کە خەلک مەجبوور دبە ب بەهایەکی گران و هنەک جارا کێم کوالێتی ژی ئار بکرن.
"وەلید خوەدێدا" وەلاتیەکی قەزا شنگالێ یە دبێژە، "ژبەر نەهاتنا ئارێ خوارنێ ئەم هەر مەهـ ب نێزیکی سەد هەزارێت دینارا ئارێ خوارنێ دکرن بەلکی زێدەتر ژی ئەڤ ژبلی ماددەیێت دی یێت خوارنێ ڤێ یەکێ بتنێ مووچەکی مەهانە حەوجەیە".
گۆتژی، "هنەک مەها ئار تێ و چەند مەها ل پشت رە نایێ ژبەر وێ یەکێ تەلیسێ ئارێ کە ب کێری خوارنێ بێ نە کێمی چێل هەزار دینارێت عراقی دئێتە فرۆتن ل بازار و گەلەک مال هەینه ب ڤی بەهای نکارن بکرن".
بەشەکی دی ژ خەلکێ شنگالێ دخوازن ل ڤێ سالا نوو دا حکومەت وان قەرەبوو بکە یانژی هەرچ نەبیت ئێدی هەیڤانە ئار و ئاهێت خوارنێ پێ بێنە دان.
خدر ئەلیاس وەلاتیەکێ دی یە ژ شنگالێ ب رێیا چیا پرێس دخوازە، " ئالیێت کاربدەست ب ئاوایەکی باشتر چاڤدێریا ڤێ کێشەیێ بکن و هەر چ نەبە بەهایەکی گونجای ژ ئار و ماددەیێت دی یێت خوارنێ داینن دا پتر تەعدە ل خەلکێ نەیە کرن".
"دڤێت حکومەت گۆھ ل ئاریشێت وان بێ و کابینە نوویا حکومەتێ پتر هاریکاریا وان بکە نەک هەر چ کەسێ هات بارێ وەلاتیا گرانتر بکە"، خدر ئەلیاس وەها گۆت.
هەر چەندە مە هەول دان کو کۆمپانیا ئامادەکرنا ئار ل پارێزگه‌ها نەینەوا وەرگرن لێ چ بەرسڤ نەبوون رێڤەبەرێ تەموینا وێ پارێزگەهێ ژی دبێژە دەرەنگیا گەهشتنا ئار و ماددەیێت دی یێت خوارنێ نە ب دەستێ وانە و ئاگەهی ژێ هەنە بەلێ گەهاندنە ئالیێت بلند ل وەزارەتا بازرگانیێ.