چیا پرێس - خێرۆ گرعزێری

ب دەهێت سالایە خەرابیا کەهرەبێ ل شنگالێ و ناڤچەیێت بسەرڤە هەیە، نە چێتر بوویە نەژی ڤۆلتیا وێ زێدەتر بوویە بەلکی رۆژ رۆژ ئەڤ مەلەف زەحمەت و نە خوەشیا پتر ژی ژ خەلکێ ڤێ قەزایێ رە چێدکە لۆما خوەست و گازنێت بەردەوام ژ حکومەتێ هەینە کە جارێ تالیەکا ڤی فلمی ژی ببینن.

سەبری عەلی یەک ژ خەلکێ شنگالێ یە بڤی ئاوای گازنا ژ خەرابیا کەهرەبێ ل دەڤەرێ دکە، "خەرابیا کەهرەبێ و لاوازیا وێ دبە سەبەبێ شەوتاندنا گەلەک ئامیرێت کارەبای وەک سۆپە، تەلەفزیۆن و گەلەک ئامیرێت دی گەلەک جارا رۆژێ هەمووێ بتنێ 3 سەعەتا کەهرەب هەیە یانژی ب یەکجاری نایێ ل هنەک گوند و کۆمەلگەها".

ئەو ژی گۆت، "گەلەک جارا ل سەعەتەکێ دە زێدەتر ژ دەھ جارا کارەب دچە و تێ یانژی گەلەکا لاوازە و یەک ئامیرە پێ کارناکە، ب شەڤێ ژی گەلەک جارا نینە و ژبەر نەبوون و گرانیا بەهایێ گازا موەلیدێت کارەبا ئەهلی ژی راکرینه ئەم مەجبور دبن شەڤێت خوە لبەر رۆناهیا فانۆس و لەمپەیا دەرباس بکن".
 

فەرحان رەشۆ وەلاتیەکێ دی یێ ڤی باژاری یە دبێژە، "داخوازێ ژ ئالیێت کاربدەست و وەزارەتا کەهرەبێ دکن چارەکێ ژ کەهرەبا ناڤچەیێت مە رە بێتە دیتن بەری چ کارەسات ژ سەبەبا کەهرەبێ چێبن".

گازنێت ڤێ قەزایێ نە بتنێ یێت خەلکێ نە بەلکی رێڤەبەریا کەهرەبێ ژی حکومەتا مەرکەزی بێ خەم دبینێ ژئالیێ پەیداکرنا پێدڤیێت زێدەکرنا کەهرەبێ و پتریا کاروبارێت خەلکێ لسەر هەبوونا رێکخراوێت نیڤ دەولەتی دمینێ نەک لسەر کارێت حکومەتێ.

ئەندازیار محەمەد رێڤەبەرێ کەهرەبا قەزا شنگالێ ژ چیا پرێس رە گۆت، "ویستگەهێت مە هەین کارن بتنێ تێرا شنگالێ کەهرەبێ پەیدا بکن لێ ناحیێت گرعزێر، قەیرەوان و کۆمەلگەهێت دۆمیز و سیبا شێخ خدرێ لسەر ئا شنگالێ نە و بووینه بارەکی گران ژبەر وێ یەکێ کەهرەبا لاوازە و تێرا خەلکێ ناکە و براستی حکومەت گەلەک ل کێشا شنگالە بێ خەمە و کارێ خوە گەلەکێ ب دەرەنگی دکە".

"بریارە ل سالا نوو دە ویستگەهەکا دی ل شنگالێ بئێتە چێکرن و ب ڤێ یەکێ ژی ئەم بەهوەرن هنەک ژ گازنێت خەلکێ لسەر کەهرەبێ کێم ببن" ئەندازیار محەمەد وەها گۆت.