چیا پرێس - خێرۆ گرعزێری

هەشت سال بسەر هێرشا تیرۆرستێت داعش بۆ سەر شنگال و کۆمکوژیا ئێزیدیا ل دەڤەرێ دەرباس دبە لێ هیش دەڤەرێت وان دبێ خزمەتگوزاری نە و خەلکێ ڤەگەریای دژیانەکا پەریشان و بێ قەرەپۆکرن دژی.

ژمارەکا مەزنا خەلکێ ئێزیدی ل شنگالێ بووە قوربانی چ ئەوێت ژبا داعش ڤە هاتینە کوشتن و رەڤاندن چ ژی یێت ئاوارە بووین، و رۆژ بۆ رۆژێ ژی و ژبەر رووداونێت نە خوەش یێت ب سەرێ وان دئێن ژمارا وان ل عراقێ کێم دبە.

زێد خەلەف یەک ژ خەلکێ کۆمەلگەها زۆر ئاڤایێ یە ل باکوورێ چیایێ شنگال ژ چیا پرێس رە وەها گۆت، "ل پشتی رزگارکرنا شنگالێ ڤەگەریانە جهێت خوە لێ هەتا نهوە حکومەتێ چ هاریکاری ژمەرە نەکرینه و ئەم هیش نە هاتینە قەرەپۆکرن".

هەروەها برێیا چیا پرێس ئەڤ وەلاتی داخوازێ ژ ئالیێت کاربدەست دکە "چارەنڤیسێ رەڤاندیێت ئێزیدی بئێتە دیارکرن و ژینگەهەکا باش ل دەڤەرێ بئێتە دابینکرن دا خەلک تالی ب ژیانا ئاوارەیێ بئینێ".
 

سەرباری وێ یەکێ کە جڤاتا نوونەرێت عراقێ بەریا چەند سالا شنگال وەکە دەڤەرەکا وێران ژ ئەنجامێ هێرشا تیرۆرستێت داعش ل سالا 2014ـێ دیارکر لێ هەتا نهوە نە هاتیە ئاڤاکرن و رێژا هەرە مەزنا خەلکێ دەڤەرێ نەهاتیە قەرەپۆکرن و ژبێ خزمەتگوزاریا دنالینن.
 

قائیمقامێ قەزا شنگالێ ب وەکالەت فەهەد حامد ژ چیا پرێس رە خویاکر، " هەتا نهوە و پشتی هەشت سالا ژ کۆمکوژیا ئێزیدیا و هێرشا داعش بۆ سەر شنگال تنێ 30% ژ خەلکێ دەڤەرێ ڤەگەریایە سەر جی و وارێت خوە و دبیە 22 هەزار مال ب نێزیکی  و 20% چووینە ژ دەرڤەی وەلات هەروەها 50% ژ ئێزیدیێت شنگالێ ل کەمپێت هەرێما کوردستانێ وەک ئاوارە دژین و رێککەفتنا بەغدا و هەولێر ژی ب بەرژەوەندیێت سیاسی دزانێ و ب ئەگەرێ نەڤەگەرا ئاوارەیان دبینە".

لگۆری قائیممقامێ شنگالێ ب وەکالەت، "حکومەتا عراقێ وەک قوربانیدانا خەلکێ شنگال و تایبەت ئێزیدیا 5% ژ خەلکێ رە چ تشت نەکریە و مە چەند جارا گلی و داخوازێت خەلکێ گەهاندینە ئالیێت بلند ل حکومەتێ دە لێ بێ مفا بوویە".