چیا پرێس - خێرۆ گرعزێری

ئاڤ یەکە ژ ژێدەرێت هەرە گرنگ و سەرەکیێت ژیانێ یە لێ ل پتریا گوندێت شنگالێ کێمیا ئاڤێ هەیە و ئەڤ یەک بوویە جهێ دلگرانیا خەلکێ ڤان گوندان و داخوازیێت وان ژ حکومەتێ و رێکخراوێت هاریکار ئەون چارەیەک ژوان رە بئێتە دیتن و ئاڤ بگەهیە گوندێت وان.
 

سەمیر جەلال ژ خەلکێ گوندێ کانی سارکێ یە ل قبلەتا چیایێ شنگالێ ژ چیا پرێس رە گۆت، کە "ئاریشا کێمیا ئاڤێ ل گوندێ وان ئەڤ چەند سالن پەیدا بوویە و حکومەت ژی ب یەکجاری نا هاریکارە و چ پرۆژێت ئاڤێ ل گوندێ وان چێنەکرینه ژیانا وانژی لسەر ئاڤا بیرا یە و هاتنا کەهرەبێ یە.

خوەیاکر ژی، "وان داخواز ژ چەند رێکخراوا کریە کو بیرەکا باشا ئاڤێ ل گوندێ وان بئێتە چێکرن و ئاڤ ل ناڤ گوندێ وان بگەریێ هەر چەندە هنەک رێکخراوا سۆزدایە ژ وان رە چێبکن لێ هەتا نهوە  کارێت گرێدای ئاڤێ ل گوندێ وان نە کرینە".
 

هەروەها وەلید خوەدێدا یەک ژ ئاکنجیێت گوندێ وەردیێ یە ژ چیا پرێس رە گۆت، "گوندێ وەردیێ یەک ژ گوندێت کە پتریا خەلکێ وێ ڤەگەریایە سەر مال و حالێت خوە لێ ژبەر کێمیا ئاڤێ ل گوندێ وان ئەو نەچار دبن تانکیێ ئاڤا شیرین ب پێنج هەزار دیناری بکرن زێدەی وێ یەکێ کە بیرەکا ئاڤا شیرین ل گوندێ وان هاتییە کۆلان لێ ئاڤ تێرا خەلکێ گوند ناکە و نا گەهیە رەخەکا تەمام ژ گوند".

ئاشکەرا کر، "هنەک جارا دبنە دەھ رۆژ یان زێدەتر ژی هەتا جارەکێ ئاڤ دگەهیە وان و ئەو مەجبوور دبن ب بەهایێت گران ئاڤێ بکرن ژبەر رۆژێت هاڤینێ یێت گەرم حەوجەیا وان پتر ب ئاڤێ هەیە".

پتر ژ 15 سالایە کێشا کێمیا ئاڤێ ل گوندێت شنگالێ سەرهلدایە لێ بێی چ چارە لێ بێتە کرن و حکومەت ژی ب دەست ڤالای مایە.

رێڤەبەرێ ئاڤا ناحیا گرعزێر عامر نایف دبێژە، "وان چەند جارا حکومەتا عراقێ ب ئاریشا کێمیا ئاڤێ ئاگەهدار کریە لێ چ کار و پرۆژە ل گوندێت وان دروست نەکرینه ب حجەتا وێ یەکێ کە ئەو نکارن چ پرۆژە ل شنگالێ چێکن هەتا خەلکێ وێ ب تەمامی ڤەنەگەریە شنگالێ".
 

تەئکید کر ژی، "بریارە ل تالیا مەها 7 رێکخراوا GIZ و IOM پرۆژەیێ ئاڤا ناحیا گرعزێر و کۆمەلگەها سیبا شێخ خدرێ ببنە سەرا و دەست ب تەمام کرنا وی بکن". 

دا زانین، "هەکە رێکخراوەک یان خەلکێ وان گوندا هاریکار بێ ب دابینکرنا گازێ ئەمێ کاربن ئاڤێ بگەهیننە خەلکێ گوندێت چیایی".