چیا پرێس- خێرۆ گرعزێری

هەیاما پتر ژ سێ سالایە هشکە سالی ل شنگالێ ژ ئەگەرێ کێمیا باران بارینێ پەیدابوویە و ب ڤێ یەکێ ژی چاندن ل قەزا شنگالێ دوو قاتی بەرێ ب زەحمەت کەتیە.

دنهوە دە ژمارەکا خەلکێ دەڤەرێ کارێ بوستانا دکن و بەرهەمێ وەکە بەعجانێت سۆر و ڕەش و خەیار و زەبەشا دچینن لێ لگۆری کە ئەو دبێژن ئەرزانیا بەهای و کێمیا ئاڤێ زەرەرێ ب وان گەهاندیە.

خدر ئۆسمان خوەدانێ بوستانەکی چاندنێ یە ل شنگالێ ژ "چیا پرێس" رە وەها گۆت، "ئەم زەحمەتەکە زێدە ب بوستانا ڤە دبینن هەتا ئەم دچینن و دەرمان دکن و بەرهەم دگرن، لێ بەرهەمێ وان ب ئەرزانی دئێتە فرۆتن و گەلەک جاران ژی بەهایێ وان دەرمانا دەرناکەڤێ ئەو دەرمانێ ل بوستانا تێنە خەرج کرن".
 

خوەیاکر ژى، "بەرێ وان کیسێ کیمیایێ ب 30 هەزاری دکری لێ نهوە سێ قات بوویە و ب 90 هەزاری دکرن و دەرمان ژی گەلەک بەها بووینه یانژی بەرهەم نائێتە فرۆتن گەلەک جارا مەجبوور دبن ژ عەلوایێ ڤەگێرنە مالێ و کەدا وان یا رۆژانە ژی بەلاش دچە".
 

هەروەها جەلال ئەلیاسێ خوەدان بوستان کە ئەڤ چەند سالن بوستان دچینێ ل شنگالێ خوەیاکر،" هەکە بەرهەمێ وان بۆ ژدەرڤە نە ئێتە شاندن زەرەرەکا مەزن وێ ب وان کەڤێ و کەدا وان ئا چەند مەها وێ ب بەر ئاڤێ دە چە".

گۆتژی، "ژ خوە ئاڤا پرۆژە ل ڤی جهی نینە و گازا سیبایێ و بەهاتیا دەرمانا ل بازار دە بارێ وان گران کریە بێی کە حکومەت ژ چ ئالی ڤە هاریکاریا و هەکە بەهایێ بەرهەمی بڤی ئاوایێ ئەرزان بەردەوام بوو ئەو نەچارن دەست ژ کارێ چاندنێ بەردن".

رێڤەبەریا چاندنا قەزا شنگالێ ژی وەکە خوەدانێت بوستانا ب گازنە و نە چ دەرمان و چارەسەری ل بەردەستێ وان هەیە نەژی حکومەت حەوجەیێت وان دابین دکە.

شەرەف نایف رێڤەبەرێ چاندنا شنگالێ ئاشکەرا کر،" وان چەندین جاران داخواز ژ حکومەتا عراق و هەرێما کوردستانێ کریە گازێ و دەرمانا ژ جۆهتیارا و خوەدانێت بوستانا دابین بکن و بەرهەمێ وان بۆ ژدەرڤە بێتە شاندن ژبەر کە غەدرەکا مەزن لێ دبە و سالانە ب سەدان تەنێن بەرهەمێ وان بەلاش دچن لێ هەتا نهوە حکومەتێ چ ژ وان رە نەکریە و سۆزێت خوە ژی نە برینە سەرا".
 

قەزا شنگالێ ب دەڤەرەکا گرنگ و باش ژ چاندنێ رە دئێتە هژمارتن کە دکەڤیە رۆژئاڤایێ پارێزگەها نەینەوا و لگۆری ئامارا ل پێش سالا 2014ێ پتر ژ 900 جۆهتیاری ل ڤێ دەڤەرێ هەبوون و کارێ چاندنێ دکرن کە پتریا وان خەرجیێت مالێت وان لسەر ڤی کاری بوون.