چیا پرێس - خێرۆ گرعزێری

شنگال ب ئاوایەکی گشتی ژئالیێ وەرزشی ڤە هاتیە پشتگۆهـ ئاڤێتن و تایبەت ژی نەبوونا یارگەهێت تاپێ تەعدەیەکا مەزن ل ئاستێ وەرزشێ کریە ل دەڤەرێ و گوندێت کچک دئاستەکی مەزن دە.

وەرزشڤانێت وان گوندا گازنا ژ نەبوونا یاریگەها دکن و هەر چەندە هنەک ئالیا سۆزا چێکرنا یاریگەها ل هنەک ژ وان گوندا دابوو لێ هیش نەهاتینە چێکرن.

حەواس ئەلیاس لیستکڤانەکی تاپێ یە ژ "چیا پرێس" رە گۆت، ل شنگالێ لیستکڤانێت شارەزا دبوارێ تاپێ دە هەینە لێ ئەم پێدڤی ب یاریگەهێت تاپێ نە دا خۆل تێدە بێنە ڤەکرن و خۆرتێت شنگالێ پتر پێش بکەڤن".

خوەیاکر ژی،" ئەو پتریا جارا ل پشتا گوندێت خوە ل ئەردەکی ڤالادا ب تاپێ دکن لێ خوەدانێت ئەردا گازنا ژێ دکن ژبەر ئەرد دبنە تۆز و تەعدە ل بوستانێت وان دبێ".

هەروەها خەلەف خودێدا ل تیما گوندێ وەردیێ دە دلەیزێ دبێژێ: "گوندێ وان پێدڤی ب یاریگەهەکێ یە دا بکاربن ل گوندێ خوە دە یاریێت خوە بکن لۆما ژی داخوازێ ژ ئالیێت کاربدەست دکە هاریکاریا وان بێتە کرن و یاریگەھ ژ وان رە بێنە چێکرن دا ئاستێ وان یێ وەرزشی بەر ب لاوازیێ نەچە و پتر گرنگیێ پێ بدن.

هەر چەندە گەلەک جارا جهەتێت کار ب دەستێ وان سۆزا چێکرنا یاریگەها و پشتەڤانی کرنا وەرزشێ ل شنگال و دەردۆرێت وێ دایە لێ چ ئەنجامەک خوەیا نەبوویە هەتا نهوە.

ژ ئالیەکی ديڤه باسم قاسم کاپتنێ یانا وەردیێ ئاشکەرا کر، "بەریا چەند مەها رێکخراوەکێ بریار دابوو یاریگەهەکا تاپێ ژوان رە چێکە و هاریکاریا وان بکە لێ هیش چ تشت ژ وان رە نە هاتیە کرن و چ کەسەکی سەرێ خوە ل وان نە ئیشاندیە و پشتگۆهکرینە".

ل شنگالێ نێزیکا 5 یانەیێت وەرزشی هەینە کە ب فەرمی ژبا رێڤەبەریا وەرزش و لاواڤا ل پارێزگه‌ها نەینەوا هاتینە تۆمارکرن زێدەباری چەند یانەیێت نە فەرمی و لیستکڤانێت خورت لێ د ئاستێ پێدڤی دە هاریکاری و پشتەڤانیا وەرزشێ ژێ رە نا ئێتە کرن.